alek nagari minang (ba pasambahan kito hari nan ko judulnyo taragak takana)

Pasambahan iko disampaikan dek si alek ka sipangka, dek karano ado siriah jo sadah nan dilayangkan dari si pangka ka nagari.

Bapak Ulul Azmi sebagai Tuan Katik Marajo, 

Bapak Fardinal sebagai Pakiah Sinaro, 

Bapak Sadri Amri sebagai Sutan Rajo Bunsu.

Pakiah Sinaro          : Ooo.. Tuan Katik, lai tuan du

Katik marajo             : Yo, Tuan Pakiah

Pakiah Sinaro      : Ma Tuan Katik, dimuliakan Tuan jo pasambahan, Sungguahpun ka Tuan surang tibonyo sambah, tantu nak sarapek papek nyolah silang nan bapangka, karajo nan bapokok. Sambah manyambah kito pulangkan kapado Allah, salawat dan salam kapado Nabi, kato sajo kito pakatokan. Apolah nan jadi buah kato, maagak dihari nan dahulu, di silang nan bapangka karajo nan bapokok manaruah niat jo nasa, apolah nan kamanjadi niat jo nasa, kok siriahnyo bacabiak, pinangnyo bagatok, kulansiang lapeh padah talayang kabakeh Urang Gaek sarato  dunsanak, baa dek Rang Gaek jo Dunsanak, dihari nan sahari nagko, kok janji batapati, ikara bamuliakan, tumah labuah nan panjang lah baturuik, halaman nan laweh lah bapijak, janjang takanak lah batingkek, bandua tarantang lah batapiak, kini lah hadia di tangah rumah nangko. Kok lapiak takambang lah bakaduduaki, siriah sakapua lah bakunyah. Pun baato hanyo lai, Kok ado nan taragak takana. Dek rumah ko baujuang bapangka. Duduak nak baiyo tagak nak baramuah jo Tuan Katik

Katik marajo           : Sampai Pakiah Sinaro

Pakiah Sinaro         : Sakiro-kiro alah Tuan

Katik marajo           : Ma Pakiah Sinaro, Sabalun kato bajawab gayuang basambuik baiyo sapatah dulu Pakiah.

Pakiah Sinaro         : Dalam adat Tuan

                                   (Katik Marajo, mampalengongkan suok jo kida kabakeh niniak mamak sialek, nan satampuah lalu, sabondong suruik)

Katik marajo           : Pakiah Sinaro, dikumbalikan parundiangan ka Pakiah

Pakiah Sinaro         : Dijapuik Tuan

Katik marajo           : Sungguahpun ka Pakiah Sinaro kumbalinyo sambah, tantu nak sarapek-papeknyolah Rang Gaek salingka duduak sarato dunsanak karapatan. Sunat kato dek baulang, pasa jalan dek batampuah, Sapanjang buah panitahan Pakiah tadi nan ka ambo ulang. Apolah kato Pakiah tadi Sambah manyambah kito pulangkan kapado Allah, salawat dan salam kapado Nabi, lai nan kato sajo kito pakatokan. Apolah nan kamanjadi buah kato, maagak dihari nan kapatang tibonyo di silang nan Bapangka Karajo nan Bapokok tantu manaruah niat jo nasa, apolah nan kamanjadi niek jonasa kinitu, kok siriahnyo bacabiak pinangnyo bagatok, kulansiang lapeh padah talayang kabakeh Urang Gaek  sarato  dunsanak, baa dek Rang Gaek jo Dunsanak dihari nan sahari nangko kok janji batapati ikara bamuliakan, tumah labuah nan panjang lah baturuik, halaman nan laweh lah bapijak, janjang takanak lah batingkek, bandua tarantang lah batapiak, kini lah hadir di tangah rumah nangko. Lapiak takambang lah baduduaki, rokok sabatang lah baisok, siriah sakapua lah bakunyah. Pun baato hanyo lai, Kok ado nan taragak takana, dek karano rumah ko baujuang bapangka, duduak nak baiyo tagak nak baramuah jo Tuan Katik, kan baitu lalunyo Pakiah Sinaro.

Pakiah Sinaro         : Io bana baitu Tuan

Katik marajo           : Ma, Pakiah Sinaro, Dek kito nan baadok batunggalan, bana raso sasuai paham raso saukua, nan bana kato baiyo nan rajo kato mupakat, dek  karano rang gaek lai samo diadok, alua lai samo di pangku, ambo bao kato Pakiah tu jo mupakat , mananti Pakiah sakutiko, Lai kasaba Pakiah.

Pakiah Sinaro         : Sampai Tuan Katik, mulonyo pasambahan dianta kabakeh Tuan, io bana kok kailia nak sarangkuah dayung, kamudiak nak satumpu galah, kato nan tabao jo mupakat Tuan

Katik marajo            : Ambo kamambao kato jo mupakat, Pakiah mananti lai kasaba ?

Pakiah Sinaro          : Sakiro- kiro Tuan

                                    (Katik Marajo mambaok parundiangan Pakiah Sinaro ka sasamo sialek, untuk mancari kato mufakaik. Pasambahan ditujukan kabakeh Sutan Rajo Bunsu)

Katik marajo            : Tuan Sutan Rajo Bunsu….. ma tuan…?

Sutan Rajo Bunsu   : Ka ambo Tuan Katik

Katik marajo            : Barudiang jo Sutan sapatah

Sutan Rajo Bunsu   : Rancak Tuan Katik

Katik marajo           : Sungguahpun ka Sutan tibonyo sambah, tantu nak sarapek-papeknyolah Rang Gaek salingka duduak sarato Dunsanak karapatan, Sambah manyambah kito pulangkan kapado Allah, salawat dan salam kapado Nabi, nan kato sajo kito pakatokan. Apolah nan kamanjadi buah kato ka Sutan Rajo Bunsu kinitu, satantangan di bisiak nan kadangaran, diimbau nan kalampauan, nan ka buah barinyo, iko nan bajapuikkan ka Sutan Rajo Bunsu.

Sutan Rajo Bunsu   : Sampai Tuan

Katik marajo           : Sampai Sutan

Sutan Rajo Bunsu   : Sabalun kato ba jawab gayuang basambuik, baiyo sapatah tuan Katik

Katik marajo           : Rancak Sutan

                                   (Sutan Rajo Bunsu mampalengongkan suok jo kida, satantang kabanaran Katik Marajo tadi)

Sutan Rajo Bunsu   : Tuan Katik

Katik marajo            : Ambo Sutan

Sutan Rajo Bunsu   : Dikumbalikan parundiangan ka Tuan

Katik marajo            : Dijapuik Sutan

Sutan Rajo Bunsu : Ma Tuan Katik, Sungguapun Katuan Katik tibonyo sambah, tantu nak sarapek papeknyolah Rang Gaek salingka Duduak sarato Dunsanak karapatan, dibaliak-baliak bak mamanggang diulang ulang bak manyapuah, aratinyo kabanaran Tuan tadi nan ka ambo ulang, apolah kato Tuan tadi, sambah manyabah dipulangkan kapado Allah, salawat dan salam kapado Nabi, lai nan kato sajo kito pakatokan, apolah nan kamanjadi buah kato di Tuan tadi, satantangan di bisiak nan kadangaran diimbau nan kalampauan, nan ka buah barinyo bajapuikkan ka Sutan, kan baitu lalu Tuan.

Katik marajo            : Io bana baitu Sutan

Sutan Rajo Bunsu : Ma Tuan Katik, dek kito nan baadok batunggalan bana raso sasuai, paham raso saukua, dek  karano rang gaek lai samo diadok, ambo japuikan nan kabuah barinyo ka bakeh baliau, manati Tuan sakutiko.

Katik marajo           : Ma Sutan Rajo Bunsu, mulonyo kato diantakan kabakeh Sutan Rajo Bunsu, io bana kok kailia nak sarangkuah dayuang, kamudiak nak satumpu galah,  kato nak tabao jo mupakat Sutan

Sutan Rajo Bunsu   : Ambo mambao kato jo mupakat, Tuan mananti lai kasaba

Katik marajo            : Sakiro-kiro Sutan

                                   ( Sutan Rajo Bunsu manjapuiak nan kabuah barinyo kabakek niniak mamak, alah dapek kabuah barinya dari niniak mamak, pasambahan dikumbalikan ka bakeh Katik Marajo)

Sutan Rajo Bunsu   : Tuan Katik Marajo

Katik marajo            : Lai Sutan Rajo Bunsu

Sutan Rajo Bunsu  : Ma Tuan, dihari nan tadi Tuan Katik ambo sabakan manuruik Adat, samantaro ambo manjapuikkan nan ka bua barinyo ka bakeh urang Gaek salingka duduak sarato dunsanak,  baa dek Urang Gaek sarato dunsanak, lah ado nan kabuah barinyo dek baliau, dek baliau lah baanta ka Ambo, dek Ambo kabaanta ka bakeh Tuan, Alah koh rancak dianta Tuan.

Katik marajo            : Ambo japuik Sutan

Sutan Rajo Bunsu   : Ma Tuan Katik, nan kaantanyo kinitu satantangan nan taragak takana, bapambarianlah Tuan disinan nan kami disiko tinggi maanjuang gadang maamba, itulah nan kabua barinyo Tuan.

Katik marajo            : Alah sampai Sutan Rajo Bunsu

Sutan Rajo Bunsu   : Alah Sampai Tuan

Katik marajo            : Ma Sutan Rajo Bunsu, dihari nan tadi, Ambo Sutan sabakan jo parundingan, samantaro Sutan mancarikan aia nan janiah sayak nan landai kabakeh urang gaek salingka duduak sarato dunsanak karapatan, tumah lah dapek dek baliau nan ka buah barinyo, lah baantakan ka Sutan, dek Sutan lah baantakan pulo ka ambo, alah nan kaantanyo kinitu satantangan, nan taragak takana bapambarianlah Tuan disinan, nan kami disiko tinggi maanjuang gadang maamba, kan baitu bana lalu nyo Sutan

Sutan Rajo Bunsu   : Io bana baitu tuan.

Katik marajo       : Ma Sutan, dek karono panehko bapuhun, hujanko barasa, disagoan rotanko ka ureknyo, kato  ka nan tabik, lai bana tu Sutan

Sutan Rajo Bunsu : Ma Tuan Katik, Nak tampak pasa bakeh bamalam, bateh tampek baranti, iolah rancak rotan disagokan kaureknyo, kato ka nan tabik Tuan.

Nan kito baa Sutan

Sutan Rajo Bunsu   : Baranti kito Tuan Katik.

(Katik Marajo mangumbalikan pasambahan ka bakeh si alek)

Katik marajo           : Pakiah Sinaro

Pakiah Sinaro         : Lai Tuan Katik

Katik marajo           : Dikumbalikan Pasambahan kabakeh Pakiah

Pakiah Sinaro         : Rancak Tuan Katik

Katik marajo      : Ma Pakiah, dihari nan cako Pakiah Ambo sabakan manuruik, samantaro ambo  mancarikan aia nan janiah sayak nan landai kabakeh rang gaek sarato dunsanak, ruponyo dak gambuang lukah di aia, dak sasak bintang di langik, tiok kandak tiok bulaku, tiok pintak tiok babari, pucuak dicinto ulam tibo, sumua digali aia tabik, tumah lah ado nan kabuah barinyo di baliau, lah baantakan ka ambo, di ambo kabaanta kan pulo ka bakeh Pakiah, alahkoh rancak diaata Pakiah.

Pakiah Sinaro         : Ambo japuik Tuan Katik

Katik marajo            : Ma Pakiah, nan kaantanyo kinitu, satantangan nan taragak takana, samo mananti malah kito, kok dima katabiknyo, ikolah nan kaantanyo Pakiah.

Pakiah Sinaro         : Sampai Tuan

Katik marajo           : Sampai Pakiah

Pakiah Sinaro         : Ma Tuan Katik, dek karano kandak lah buliah, pintak lah balaku, lah manyanangkan ka hati rasonyo Tuan

Katik marajo           : Sabana baitu Pakiah

Pakiah Sinaro         : Nan kito Tuan Katik

Katik marajo           : Baranti kito Pakiah Sinaro

lapiak tarantang bakalangulu,
tampek si bujang maluruihan badan,
tulisan ambo sampai disiko dulu,
lain wakatu ambo sampaikan dalam tulisan.,

wassalam..